Charles Leclerc “mbret” në GP Australia, motori tradhton Verstappen

Charles Leclerc ka fituar Çmimin e Madh të Australisë në Formula 1. Piloti i Ferrari e nisi i pari dhe e mbylli i pari, ndërkohë që pa edhe rivalin e tij, Max Verstappen të dilte pa asnjë pikë.

Për shkak të një problemi në motor, kampioni në fuqi i botës braktisi garën në xhiron e 39-të, ndërkohë që në vend të dytë e mbylli makina tjetër Red Bull, me Sergio Perez në timon.

Dy makinat Mercedes e mbyllën në vend të tretë dhe të katërt. George Russell plotësoi podiumin, duke lënë pas patriotin e tij Lewis Hamilton.

Një tjetër britanik i pasoi, Lando Norris, i cili u rendit i pesti, para shokut të tij të skuadrës, australianit Daniel Ricciardo. I pafat ishte sot Carlos Sainz, i cili humbi kontrollin e makinës që në xhiron e parë dhe doli nga gara.

I aksidentuar përfundoi edhe Sebastian Vettel, prej të cilit u fut në pistë edhe makina e sigurisë dhe e rihapi garën për një moment. Gjithsesi në fund ishte Leclerc që ia doli të fitonte. / oversport.tv