Kukësi përgënjeshtron gjithçka: Longo do të qëndrojë

Kukësi ka përgënjeshtruar lajmin e largimit të trajnerit italian Diego Longo. Nëpërmjet një komunikate për shtyp, klubi ka sqaruar pozicionin e tij dhe të trajnerit, si dhe i kanë dhënë besimin e plotë teknikut për të vazhduar rrugëtimin e tij në Superiore.

Ata kanë sqaruar gjithçka nëpërmjet një postimi në Facebook.

Postimi i plotë

“Menjëherë pas ndeshjes ndaj Teutës, kundrejt klubit tonë kanë nisur publikimet e lajmeve të pavërteta dhe dashakeqe nga “Panorama Sport” dhe aludime se trajneri Diego Longo ka dhënë dorëheqjen. Futboll Klub Kukësi hedh poshtë këto lajme të pavërteta dhe kërkon që kjo media të tregohet profesionale karshi Kukësit ashtu si klubi ka treguar profesionalitet dhe ka qenë gjithmonë i hapur për të gjitha mediat.

Futboll Klub Kukësi konfirmon pozicionin e trajnerit Diego Longo dhe siguron të gjithë se trajneri do të vazhdojë të jetë në drejtimin e Kukësit. Barazimi ndaj Teutës, normalisht nuk ishte një rezultat pozitiv por stafi teknik do të analizojë ndeshjen dhe do të nisin përgatitjet për ndeshjen e radhës ndaj Partizanit.

Stafi drejtues ka besim të plotë te trajneri Longo dhe te futbollistët e skuadrës dhe nuk ka asnjë lloj presioni karshi tyre nga ana e klubit, duke qenë se po bëhet një punë shumë e mirë dhe jemi në garë për objektivat sezonalë që kemi.

Edhe një herë tjetër, kërkojmë nga mediat që të tregohen profesionale karshi klubit dhe për çdo informacion që kërkojnë, mund të kontaktojnë zyrën e shtypit, e jo të informohen nga njerëz keqdashës të jashtëm që kërkojnë me çdo kusht të dëmtojnë klubin tonë”, shkruhej në postimin e klubit. /oversport.tv

Foto: F.K Kukësi Albania Facebook