Prizreni 16 ka fituar ndaj Rahovecit me rezultat 95:89 (22:23, 36:21, 20:25, 17:20) në xhiron e tretë të Ligës Unike.
Vreshtarët e nisën ndeshjen me një seri prej 0:6, megjithatë, vendasit rikthehen shpejt dhe më pas zhvillohet lojë e baraspeshuar. Çereku i parë përfundon me rezultat 22:23.
Prizrenasit e filluan furishëm periodën e dytë, duke pasur epërsi deri në 12 pikë, 40:28 dhe ishin në epërsi konstante, kurse pjesa e parë përfundoi me shifrat 58:44.
Lojë interesante u zhvillua në periodën e tretë, ku mysafirët ngushtuan shifrat në 67:62, megjithatë, vendasit me një seri prej 10:0, shkëputen në 77:62. Rezultati në semafor pas 30 minutash ishte 78:69.
Rahoveci nuk u dorëzua dhe ngushtoi rezultatin në 88:85, por pa arritur të bëjë më shumë. Prizreni 16 triumfoi me shifrat 95:89.
Te Prizreni 16 u dalluan Urim Zenelaj me 13 pikë e 17 kërcime, Ivan Koljeviç me 27 pikë e nëntë asistime dhe Courtney Fells me 24 pikë e 11 kërcime.
Nga ana tjetër te Rahoveci u dalluan Milik Yarbrough me 23 pikë e 15 kërcime, Altin Morina me 24 pikë e gjashtë asistime dhe Tyheim Monroe me 20 pikë e 10 kërcime.
Prizrenasit kanë dy fitore dhe një humbje, ndërsa Vreshtarët tri humbje në tri ndeshje. / Liga Unike
View this post on Instagram
