Rikthehet në ekranin e Oversport dhe Tibo, Maratona e Tiranës 2022, që do të zhvillojë të dielën e 23 tetorit edicionin e saj të 6-të. Ky event, që këtë vit do të ketë sloganin “Vrapo për Paqe” është kthyer në ngjarjen më të madhe sportive në kryeqytet dhe këtë e tregon edhe pjesëmarrja e 2500 vrapuesve nga shumë vende të ndryshme të botës. Shtimi i numrit të pjesëmarrësve ndër vite është një tregues i mirë se kjo garë është bërë e dashur për qytetarët e Tiranës dhe më gjerë.
Edicioni i 6-të i këtij aktiviteti, i cili tashmë është kthyer në një traditë organizohet me aprovimin e tre itinerarëve të miratuar nga Federata Botërore e Atletikës duke i dhënë seriozitetin e një aktiviteti Ndërkombëtar dhe me mbështetjen e Federatës Shqiptare të Atletikës.
Gara do të mbahet më datë 23 tetor dhe do të ketë 4 kategori: Marathon (42.195 km) Half Marathon (21, 0975 km), Tirana 10K dhe “We too” kjo një kategori që ka për qëllim të jetë më shumë motivuese se sa konkurruese. Nuk do të mungojë as gara Fun Run, e cila do të zhvillohet një ditë para garës së madhe me datë 22 tetor 2022, me të rinjtë e Shkollave te Mesme të Tiranës.
Me projektin “Fun Run” organizatorët mundohen të edukojmë brezat përmes sportit, për të qenë të vendosur dhe me vetëbesim në rrugën për të arritur qëllimet e tyre. Gjithashtu, kjo të jetë një mënyrë e mirë për t’i nxitur të angazhohen me sport dhe të fillojnë të përgatiten për të konkurruar pas disa vitesh në Maratonën e Tiranës.
Itineraret e rinj të çertifikuar nga Federata Ndërkombëtare e Atletikës – IAAF, do të përshkruajnë pikat më atraktive të qytetit duke e kthyer këtë garë jo vetëm në sfidë por edhe në argëtim. Përveç se një ngjarje sportive për garuesit, do të mund të konsiderohet edhe një ditë festive për qytetin, në të cilin do të organizohen shumë aktivitete artistiko-kulturore në kuadër të këtij eventi.
Të gjithë të interesuarit mund të regjistrohen online në faqen tiranamarathon.com. / oversport.tv
