Trajneri i Teutës, Edi Martini ka folur për Oversport pas barazimit pa gola në gjysmëfinalen e kthimit të Kupës së Shqipërisë, që solli eliminimin e skuadrës durrsake nga turneu.
“Ndeshja e parë ndikoi në anën psikologjike, aq më tepër të përmbysësh atë rezultat përballë Tiranës. Edhe gjendja fizike ka qenë e ngarkuar, pasi me këtë grup lojtarësh kemi luajtur këtë periudhë. E dinim që përmbysja do të ishte e vështirë dhe rezultati i kësaj ndeshjeje nuk ndikon për sfidat e kampionatit. Janë edhe 4 ndeshje në kampionat dhe ne pretendojmë që të sigurojmë një vend në Kupat e Europës.
Skuadra po bën mirë dhe jemi optimistë për të arritur këtë objektiv. Do bëjmë të pamundurën që të arrijmë vendin e katërt. Kalendari është i vështirë, do të bëjmë maksimumin dhe shpresojmë që tia dalim. Sfida e radhës në Shkodër është shumë e vështirë, por ne do të synojmë deri në fund Europën. I uroj Tiranës që të fitojë Kupën”, ka thënë Martini. / Oversport.tv
