Ndeshja dytë në “Elbasan Arena”, Shqipëria U-17 përmbyll testet ndaj Turqisë

Është luajtur sot në stadiumin “Elbasan Arena” ndeshja e dytë miqësore mes Shqipërisë U-17 dhe Turqisë U-17, që përfundoi me rezultatin 0-3 në favor të miqve.

Trajneri i kuqezinjve, Ervin Bulku kishte bërë disa ndryshime në formacion krahasuar me miqësoren e dy ditëve më parë, duke aktivizuar edhe disa lojtarë të cilët qëndruan në stol ose u aktivizuan pak minuta në sfidën e “Air Albanias”.

Fillimi është i ngadaltë me të dyja skuadrat që përpiqen të marrin frenat e lojës në dorë dhe me të dyja skuadrat që shfaqen herë pas here në sulm me raste sporadike.

Në minutën e 23-të regjistrohet rasti i parë i rrezikshëm kur kapiteni i Turqisë, Ayhan godet me të djathtën në qendër të zonës pas një goditje nga këndi, por topi përfundon jashtë shumë afër shtyllës.

Në minutën e 33-të, Gokay provon nga goditja e dënimit në hyrje të zonës me topin që kalon afër shtyllës pingule dhe përfundon jashtë. Kuqezinjtë përpiqen të dalin vazhdimisht e të shfaqen më shumë në gjysmëfushën kundërshtare, edhe pse nuk arrijnë të godasin portën me pjesën e parë që mbyllet në shifrat 0-0.

Në nisje të pjesës së dytë të dyja skuadrat bënë disa zëvendësime, ndërsa në minutën e 51-të Shqipëria ka dy raste për gol, fillimisht me me Toskun, që godet por portieri turk reagon mirë dhe në aksionin pasardhës turqit për pak sa nuk shënojnë autogol pas këmbënguljes së kuqezinjve nga e majta. Në minutë e 55-të Vranici fiton një top në mesfushë dhe kalon dy lojtarë për të hyrë deri në zonë dhe në momentin e fundit nuk arrin të godasë si duhet topin.

Më minutën e 60-të është Gyrypyz që tenton golin pas një aksioni individual me topin që nuk gjen kuadratin. Pak më vonë është Akcicec që godet fort nga një distancë e largët me topin që bllokohet në dy kohë nga Devishi. Dhe në minutën e 66-të Dilek përfiton nga një mosmarrëveshje në mbrojtjes të kuqezinjve dhe godet saktë, duke e dërguar topin në rrjetë e duke kaluar në avantazh turqit.

Finalizimi i Bastarit në minutën e 71-të pas një aksioni model nga e majta për pak sa nuk mbyllet me gol, ndërkohë që tekniku Bulku bën edhe dy zëvendësime të tjera duke hedhur në fushë Boden e Krajkën për Vranicin dhe Toskun. Në minutën e 77-të është sërish Bastari shumë pranë golit me goditjen e tij në qendër të zonës që bllokohet në momentin e fundit.

Dhe në minutën e 84-t turqit dyfishojnë rezultatin sërish me Dilek, i cili është i saktë me të majtën dhe shënon golin e dytë personal. Dy minuta më pas është Kaya që fikson rezultatin në 0-3 me një goditje me të majtën nga jashtë zone. Në minutat në vazhdim nuk ka raste për t’u shënuar me miqësoren e dytë që mbyllet me rezultatin 0-3.

Miqësore

Shqipëri U17 – Turqi U17             0-3

Shënues: Dilek 66’, 84, Kaya 86’