Mino Raiola ka lëshuar disa mesazhe të forta dhe iu bën presion skuadrave të Milanit dhe Juventusit për dy mbrojtësit Alessio Romagnoli dhe Matthijs De Ligt. Menaxheri i njohur i të dy futbollistëve duket se nuk është shumë i kënaqur me aktivizimet e pakëta të tyre në këtë fillim sezoni dhe me deklaratat e bëra për “Rai”-n kërkon të vërë disi në lëvizje drejtuesit.
Ai thotë se Romagnoli mund të luajë në skuadrën e Juventusit sezonin e ardhshëm sepse është në skadencë kontrate, por alarmon “Zonjën” se De Ligt mund të largohet në merkaton e verës. “Ata janë dy nga mbrojtësit më të fortë në Europë.
De Ligt ka një kontratë me Juven, ndërsa Romagnolit i skadon në vitin e ardhshëm. Mendoj se edhe mund të luajnë të dy te skuadra e Juventusit sezonin që vjen. Por kujdes, ndoshta De Ligt mund të lërë Juventusin në fundin e këtij sezoni. Merkato kështu funksionon”, ka thënë menaxheri.
Një ditë më parë u publikuan nga mediat italiane të tjera deklarata të Raiolës për Donnarummën dhe Pogbanë. Ai tha se lëvizja e portierit drejt PSG-së ishte zgjedhje për karrierën, ndërsa mesfushori francez mund të transferohet te bardhezinjtë./Oversport.tv
