Shqipëria U21 ka në program dy ndeshje në muajin tetor dhe nesër pritet që trajneri Alban Bushi të dalë para mediave dhe të publikojë listën e lojtarëve të grumbulluar. Dy prej tyre i ka zbuluar Kukësi, përmes një postimi në rrjetet sociale.
Bëhet fjalë për portierin Angelo Tafas dhe anësorin e djathtë, Ergys Peposhi. Për këtë të fundit është hera e parë që merr ftesë nga Shqipëria U21, edhe pse trajneri Bushi e njeh mirë që nga ekipet e moshave kur spikaste tek Akademia e Futbollit.
“Portieri Angelo Tafas dhe mesfushori Ergys Peposhi janë dy futbollistët e ftuar nga trajneri Alban Bushi, për të qenë pjesë e ekipit Kombëtar U21.
Dy futbollistët kanë bindur me paraqitjet e tyre në 3 javët e para të kampionatit teksa ishin protagonistë edhe sezonin e fundit me ekipin tonë, duke u bërë në këtë mënyrë pjesë e Kombëtares shqiptare U21.
Për mesfushorin Peposhi kjo është hera e parë që grumbullohet me ekipin U21, por më parë është grumbulluar me Shqipërinë U20 teksa Tafas ishte pjesë e Kombëtares edhe sezonin e shkuar.
Shqipëria U21 ka dy ndeshje zyrtare për eliminatoret e Europianit ndaj Andorrës në datën 7 tetor dhe ndaj Sllovenisë më 11 tetor. Klubi i Kukësit i uron suksese dy futbollistëve të ekipit tonë dhe fitore Kombëtares kuqezi”, shkruhet në njoftimin e Kukësit. / oversport.tv
