Tomori duhet të operohet, por në dispozicion të Piolit kthehet Calabria

Një lajm i keq trondit Milanin dhe trajnerin Stefano Pioli. Klubi kuqezi konfirmon se Fikayo Tomori, që u dëmtua në sfidën e Kupës së Italisë kundër Genoas, ka një dëmtim në meniskun e mesëm të gjurit të majtë dhe ka nevojë për një ndërhyrje kirurgjikale, që do të zhvillohet sot mbasdite.

Është akoma e paqartë koha e rikuperimit dhe Milani njofton se në përfundim të operacionit do të dalë me një njoftim zyrtar, por është e sigurtë që mbrojtësi do të mungojë kundër Spezias dhe Juventusit.

Në pritje të ardhjeve të reja nga merkato, Pioli shpreson që të rikuperojë Tomorin për derbin e 6 shkurtit, por ndërkohë mund të gëzojë për rikthimin në dispozicion të Davide Calabrias.

Klubi njofton se mbrojtësi ka rezultuar negativ në tamponin e fundit që ka bërë dhe është shëruar nga coronavirusi. / Oversport.tv