Zyrtare/ Kosova nuk humbet kohë, prezantohet trajneri i ri i Kombëtares

Pasi ndërpreu bashkëpunimin me Alain Giresse për rezultate të dobëta, Kosova nuk humbet kohë dhe prezanton trajnerin e ri. Në krye të stolit të “Dardanëve” do të ulet Primozh Gliha.

Lajmin e ka bërë të ditur vetë Federata e Futbollit të Kosovës me anë të një postimi në faqen zyrtare. Në të thuhet se Gliha do të drejtojë skuadrën në ndeshjet e mbetura të ciklit kualifikues për Euro 2024, ndërsa ndihmësit e tij do të jenë Afrim Tovërlani, Arbnor Morina, Ahmet Beselica dhe Thomas Richards.

NJOFTIMI I FFK

Komiteti Ekzekutiv i FFK-së ka mbajtur sot mbledhjen e radhës, në të cilën është diskutuar për çështje të ndryshme me rëndësi për futbollin kosovar si dhe për ecurinë e përgatitjeve për edicionin e ri të garave. Në këtë mbledhje ndër çështjet kryesore që u diskutuan ishte zgjedhja e ekipit të trajnerëve që do ta drejtojnë Kombëtaren e Kosovës në ndeshjet e mbetura të ciklit kualifikues për Euro 2024.

Kësisoj, pas diskutimeve të arsyeshme, KE i FFK-së vendosi që në krye të shtabit teknik të emërohet Primozh Gliha, derisa atij do t’i ndihmojnë Afrim Tovërlani, Arbnor Morina, Ahmet Beselica dhe Thomas Richards. KE i FFK-së ka vendosur që t’ia besojë drejtimin e Dardanëve ekipit të brendshëm të trajnerëve që tashmë janë të angazhuar në ekipet kombëtare. Ata njëherësh do të qëndrojnë në ekipet e grupmoshave që i drejtojnë, por do të jenë të angazhuar për të ndihmuar përzgjedhësin Gliha në Kombëtaren A.